Bílaleiga - reynslusögur

Bensín í stað dísel

Nokkrir austurrískir ferðamenn leigðu bíl af íslenskri bílaleigu en lentu í því óhappi að setja bensín á bifreiðina, en hún gekk fyrir dísel eldsneyti. Vegna þessa skemmdist bifreiðin og bílaleigan rukkaði ferðamennina um 4.000 evrur, en lofaði að endurgreiða þeim ef raunverulegur viðgerðarkostnaður væri lægri. Ferðamennirnir fengu þó aldrei lokaviðgerðarreikninginn og leituðu því til ECC eftir aðstoð við að fá reikninginn og fá endurgreitt ef raunverulegur viðgerðarkostnaður væri lægri. Eftir að ECC á Íslandi setti sig í samband við bílaleiguna fengu ferðamennirnir lokaviðgerðarreikninginn, sem var hærri en það sem bílaleigan var búin að rukka ferðamennina fyrir. Þá kom í ljós bílaleigan réðst í raun í mun umfangsminni viðgerðir en bílaumboðið og framleiðandi bifreiðarinnar ráðlögðu. ECC á Íslandi gat því staðfest að bílaleigan væri ekki að hlunnfara ferðamennina og þeir fengu öll nauðsynleg skjöl í málinu.


Endurgreiðsla berst ekki

Austurrískur ferðamaður leigði bílaleigubíl á Íslandi í gegnum vefsíðu og borgaði fyrirfram. Hann neyddist til að afbóka leiguna áður en hann kom til landsins, en  samkvæmt skilmálum síðunnar var heimilt að afbóka og fá endurgreitt. Ferðamaðurinn fór fram á að bílaleigan stæði við skilmálanna og endurgreiddi honum það sem hann hafði greitt fyrirfram. Endurgreiðslan barst aldrei, en bílaleigan hélt því fram að búið væri að endurgreiða. ECC á Íslandi hafði samband við bílaleiguna og í ljós kom að bílaleigan hafði í raun sent ósk um endurgreiðslu til kortafyrirtækisins en af einhverjum ástæðum skilaði hún sér ekki til Austurríkis og ferðamannsins. Bílaleigan sendi því aftur endurgreiðslubeiðni og endurgreiðslan skilaði sér á endanum til ferðamannsins. 


Hurð fýkur upp

Pólskur ferðamaður leigði bílaleigubíl á ferðalagi sínu á Íslandi. Hann taldi svo að skil bílsins hefðu farið fram án nokkurra athugasemda frá bílaleigunni. Næsta dag hafði bílaleigan samband við ferðamanninn og tjáði honum að skemmdir hefðu fundist á bifreiðinni, en svo virtist sem hurð bifreiðarinnar hefði fokið upp. Þar sem ferðamaðurinn þurfti að ná flugi gat hann ekki verið viðstaddur tjónamatið og greiddi fyrirfram um 400.000 kr., en bílaleigan lofaði að endurgreiða honum ef raunverulegur viðgerðarkostnaður væri lægri. Bílaleigan sendi svo ferðamanninum upplýsingar um áætlaðan viðgerðarkostnað en þar kom fram bifreið af annarri tegund en þeirri sem ferðamaðurinn leigði. Taldi ferðamaðurinn því að ekki væri um rétta áætlun að ræða og leitaði til ECC-netsins. ECC á Íslandi óskaði eftir upplýsingum um lokaviðgerðarkostnað á bílaleigubílnum þegar viðgerð hefði verið framkvæmd og kom þá í ljós að um nokkuð lægri upphæð var að ræða en ferðamaðurinn hafði greitt fyrirfram. Hann fékk því endurgreiddar tæplega 150.000 kr.


Gjaldþrot bílaleigu

Franskur ferðamaður hafði samband við ECC í Frakklandi vegna íslenskrar bílaleigu. Ferðamaðurinn bókaði bílaleigubíl á netinu í maímánuði og greiddi þá um 300.000 krónur fyrir leiguna. Þegar ferðamaðurinn mætti á bílaleiguna í lok júlímánaðar og ætlaði að nálgast bílinn var fyrirtækið lokað og enginn starfsmaður á staðnum, en jafnframt var búið að loka símanúmeri fyrirtækisins. Ferðamaðurinn óskaði eftir aðstoð ECC-netsins við að fá endurgreitt. ECC á Íslandi reyndi  að ná sambandi við fyrirtækið en ekki var svarað í síma og öll bréf sem sem bílaleigunni voru send voru endursend. Við nánari skoðun kom í ljós að fyrirtækið hafði verið úrskurðað gjaldþrota fjórum dögum áður en ferðamaðurinn bókaði bíleigubílinn í maí. ECC setti sig þá í samband við skiptastjóra þrotabúsins og endaði með því að ferðamaðurinn fékk endurgreitt. 


Franskan ferðamann vantar gögn

Franskur ferðamaður lenti í tjóni á bílaleigubíl hér á landi. Engin ágreiningur var um að hann hefði valdið tjóninu, en bílaleigan rukkaði hann um 290.000 kr. og ætlaði svo að endurgreiða honum mismuninn á þeirri upphæð og raunverulegum viðgerðarkostnaði og senda honum viðgerðarreikninginn. Nokkru síðar endurgreiddi bílaleigan ferðamanninum um 72.000 kr. án þess að láta ferðamanninn fá afrit af viðgerðarreikningnum og leitaði hann því til ECC-netsins. Eftir að ECC á Íslandi hafði samband við bílaleiguna fékk ferðamaðurinn afrit af lokaviðgerðarreikningnum, en hann þurfti á honum að halda til að fá endurgreitt á grundvelli tryggingar sem hann var með. 


Bílaleigubíll afpantaður

Franskur ferðamaður pantaði bílaleigubíl í gegnum bókunarsíðu leigumiðlunar á netinu og hugðist nota hann á ferðalagi sínu um Ísland. Hann þurfti að greiða hluta leigunnar strax til bókunarsíðunnar en samkvæmt skilmálum var heimilt að afpanta leigu þar til sólarhring áður en leigutími skyldi hefjast og fá leiguna endurgreidda að fullu. Svo fór að ferðamaðurinn þurfti að afpanta leiguna áður en sá frestur sem afbókunarskilmálinn kvað á um rann út og fór hann fram á að endurgreiðslu. Þar sem tilraunir ferðamannsins til að fá endurgreitt báru ekki árangur leitaði hann til ECC-netsins. Eftir að starfsmenn ECC á Íslandi höfðu samband við leigumiðlunina fékk hann loks fulla endurgreiðslu.


Tengdar fréttir

Nýr bæklingur fyrir evrópska ferðalanga

Kominn er út handhægur bæklingur þar sem fræðast má um ECC-netið, rétt flugfarþega, bókun á netinu, bílaleigu, pakkaferðir og ýmislegt fleira sem viðkemur rétti ferðlanga. Auk þess hefur bæklingurinn að geyma fjölmargar reynslusögur frá evrópskum neytendum. Bæklingurinn nýtist svo einnig sem stílabók.


Yfirlit yfir starfsemi...

 

Úrskurðarnefnd Samtaka ferðaþjónustunnar (SAF) og Neytendasamtakanna, sem hýst er hjá Neytendasamtökunum, úrskurðar í deilumálum neytenda og fyrirtækja sem eru aðilar að SAF. Það geta m.a. verið ferðaskrifstofur, flugfélög, bílaleigur og hótel/veitingahús. Það kostar neytendur 3.500 kr. að leggja mál fyrir nefndina og alla jafna liggja úrskurðir hennar fyrir u.þ.b. mánuði frá því öll gögn hafa borist skrifstofunni, og eru þeir birtir á heimasíðu Neytendasamtakanna jafnóðum.


Deilihagkerfið

Deilihagkerfið er elsta hagkerfi í heimi, enda peningar í raun tiltölulega nýleg uppfinning. Deilihagkerfið er viðskiptakerfi sem byggir á skiptum eða samnýtingu verðmæta, og yfirleitt er um „jafningjaviðskipti“ (peer-to-peer) að ræða, en ekki það að „salan“ fari fram í atvinnuskyni. Eftir að peningar komust í almenna umferð ruddi séreignarstefnan sér sífellt harðar fram með þeim afleiðingum að ofneysla, sér í lagi á Vesturlöndum, hefur haft skelfileg áhrif á takmarkaðar auðlindir jarðarinnar.